சூழ்ந்திருக்கும் புனிதர்கள்

கரப்பான் காதில் சென்று
மூக்கில் வந்து மலக்கிடங்கைவிட
நாற்றமென
பல்லி உள்நாக்கை
துடிப்படங்கும்வரை உள்ளுக்கிழுக்க
நண்டு தேர்ந்தது விழி
எழவு டப்டப்பென்று
உறங்கவிடாது என
இதயத்தின் அருகிருந்து நரி
சர்ப்பத்தின் தலை வாயிலிருந்து
வால் ஆசனவாயில்
மண்புழுவென நரம்புகளைத்
தின்னும் பெயரறியாப் பட்சி
சாளரவிளிம்பில் அணில்
தாழ்ந்த மரக்கிளையில் காகம்
நெடுக குரூரம் பழகிய மூளையை
விரைவாய் செல்லரித்தது
சுவை கொஞ்சம் குறைவென
புழுக்கள்.