இக்கணம்

தத்தளித்து
கால்துடுப்புகளசைத்து
கரையேற
எவ்வளவு முயற்சித்தும்
மூழ்கும் தருவாயிலிருக்கிறது
அத்தனை கால்களிருந்தும்
மரத்தினின்று
இடறி விழுந்த
கம்பளிப் பூச்சி
தான் மரண விளிம்பாகிவிட்ட
தவிப்பில் தன்னொரு உள்ளங்கையை
உதிர்த்தது அந்தக் கரையோரத்தரு
மழைத்துளிகள் குத்திப் புதையும்
புள்ளியினின்று
விரியும் வட்டங்கள்
ஒன்றையொன்று முத்தமிட்டு
மடிகின்றன
காற்றின் சுழிப்பில்
அவ்விலையைப் பூச்சி
பூச்சியை இலை
மாறி மாறி துரத்தியும்
எதிரெதிர்த் திசையில்
செல்ல நேர்ந்தும் என
தீராத அலைக்கழிப்பின் இறுதியில்
வெகு அருகில்
வீழ்ந்த மற்றொரு இலை
விளிம்பைப் பற்றி
ஏறியது பூச்சி
கரை
பரந்த நீர்வெளி தொடு வான்
இப்புறமிருக்கும் நீர்நடு தனிப்பாறை
என எல்லா திசைகளிலும்
சிறுசிறு தூரம்
சென்று சலித்துக் களைத்து
நிலைத்து தவழ்ந்து கொண்டிருக்கிறது
மென்னலைகளின் சீரான லயத்தில்
இலை மேல் ரயில்